Desse kommunane er: Risør, Grimstad, Arendal, Gjerstad, Vegårshei, Tvedestrand, Froland, Åmli, Evje og Hornnes, Bygland ,Valle og Bykle.
Med dette har alle kommunane i Aust- og Vest-Agder gått over til nytt høgdereferansesystem. Dei sju kommunane i Knutepunkt Sørlandet gjekk over i 2012. Dei elleve kommunane i Lindesnes- og Listerregionen gjekk over til NN2000 våren 2015.

For alle kommunane som no har gått over til NN2000, ligg transformerte FKB-datasett tilgjengeleg på Norge Digitalt nedlastingsløsning (Geonorge.no).

Ny transformasjonsmodell (NNTrans2016A) og ny høgdereferansemodell (HREF2016A_NN200) kan du få ved å ta kontakt med Kartverket Kristiansand.

Litt om NN2000:
Sidan førre høgdesystem (NN1954) blei innført i 1954 har både landjorda og havnivået endra seg, målemetodane har blitt meir nøyaktige, og krava til presisjonsposisjonering har blitt større.

Sørlandet blir justert ned
Mesteparten av Noreg blir høgare med det nye høgdesystemet, og det er i Trysil høgdene ligg an til å bli justert mest opp - opptil 40 centimeter. Men, det er store lokale ulikskapar, og enkelte stader blir landet lågare enn før, m.a. på Sørlandet der høgdene er justerte ned med 0 - 15 centimeter. Minst i aust og mest i vest.

Landheving
Det gamle høgdesystemet i dei fleste kommunar stammar frå 1954 og heiter offisielt NN1954. Det har betydelege manglar og svakheiter. Først og fremst har det gått omlag 60 år utan at det er korrigert for landhevinga som starta då isen forsvann under siste istid, og som stadig pågår. Noreg hevar seg med nokre millimeter kvart år, på enkelte stader med inntil 5 millimeter årleg.

Dessutan er NN1954 eit anna høgdesystem enn det ein brukar i resten av Europa. Med det nye høgdesystemet, NN2000, får vi eit europeisk system som og er innført i våre naboland.

Men, kvifor er "høgde over havet" viktig?
Eitt av svara er at presisjonsposisjonering og bruk av satelitteknologi (GPS) blir stadig viktigare i ei rekke bransjar, og då er nøyaktige høgder avgjerande. I anleggsbransjen, til dømes, treng ein nøyaktige posisjonar og høgder når ein skal plassere hus og vegar.
Innan vatn og avlaup er nøyaktig høgdespesifikasjon avgjerande om ein skal få røyr og leidningar til å helle rett.

Fjelltoppar
Vanlege folke vil etter kvart kunne oppdate at det nokon stader dukkar opp nye "høgde over havet" på kartet. Men, sidan det ofte er tale om justeringar på bare nokre centimeter, og høgdene i dei fleste karta er avrunda til næraste heile meter, ligg det ikkje an til omfattande kartendringar framover.

Meir informasjon:
http://www.kartverket.no/nn2000

Prosjektleiar for NN2000 ved Kartverket Kristiansand er Åsulv Stormoen (tlf 32 11 85 48 / 924 47 450)