Informasjon om arbeida som skal utførast i Fånefjelltunnelen

Mai 2018 starta arbeida med å rehabilitere Fånefjelltunnelen på riksveg 9 i Bygland.

Tunnelen blir heilt stengd i perioden frå og med måndag 27. august til og med torsdag 27. september.

Utanom dette må det påreknast periodar med stengt tunnel på nattestid. I stengningsperioda blir det omkøyring på fylkesveg 304 mellom Byglandsfjord og Storestraum.
Før stenginga 27. august skal det gjerast ein del arbeid utanfor tunnelen. Behov for tiltak på omkøyringsvegen, fylkesveg 304, på vestsida av Byglandsfjord blir vurdert nærmare til våren. Lette køyretøy kan køyre som normalt på omkøyringsvegen, mens det blir kolonnekøyring med leiebil for tunge køyrety. Trafikkmengda i Fånefjell er på rundt 1600 køyretøy i døgnet.

• All tryggingsutrusting skal skiftast ut. Tunnelen får ny belysning, nødsamband, brannslokkingsapparat, nødtelefonar og ny og betre samanheng til Vegtrafikksentralen. Det skal byggjast nytt overvatnsanlegg inne i tunnelen, samt reinseanlegg for vaskevatn utanfor tunnelen
• Det skal forbetringar av dagens vatn- og frostsikring for å unngå drypp og isdanningar inne i tunnelen
• Det skal byggjast nytt nødfortau gjennom heile tunnelen
• Det skal setjast opp eit nytt teknisk bygg på sørsida av tunnelen
• Det skal gjerast utvidingar av fjellskjæringa nord for tunnelen for å betre siktforholda på staden
• Det blir tilrettelagt for parkering litt sør for tunnelen i samanheng med turstien over tunnelen
• Det skal bli eige system for gåande og syklande som kan trykkje på ein knapp som skrur på eit skilt som varslar bilistane om at det er gåande og syklande i tunnelen

Når Fånefjelltunnelen blir stengd blir det arbeidt heile døgnet. Arbeida på staden skal vere heilt ferdig i løpet av november 2018.