Ved større ulykker er det viktig at alle krefter blir sett inn i ein samordna innsats for å avgrense skadeverknadane. Normalt er det den sivile redningstenesta, leia av politiet eller det interkommunale brannvesen, som rykker ut til brannar, uhell og ulykker. Den sivile redningstenesta i Noreg er eit samvirke mellom ei rekkje offentlege etatar, friviljuge organisasjonar og private selskap med ressursar innan redningsteneste.

Bygland kommune sitt ansvar i ein krisesituasjon er å delta i arbeid med skadeavgrensande tiltak for å sikre menneske, miljø og økonomiske verdiar.

Kommunale myndigheiter har ansvaret for at ein har beredskapsførebuingar innan dei ulike kommunale verksemdsområda, samt eit generelt ansvar for innbyggjarane sitt ve og vel i ein krisesituasjon. Bygland kommune har ein samordna plan for kriseleiing i kommunen, som er eit naudsynt hjelpemiddel for raskt å kunne reagere rasjonelt og effektivt i kritiske situasjonar.